सम्पूर्ण बीमा बजारको करिब ३२ प्रतिशत बजार हिस्सा ओगट्न सफल नेपाल लाइफ इन्स्योरेन्स कम्पनीले ल्याएको सदाबहार जीवन बीमा योजना सफल बन्दै गएको छ । चुक्ता पूँजी ५ अर्ब ४९ करोड ९६ लाख १६ हजार ८ सय १० रहेको नेपाल लाइफको १ लाख २७ हजारभन्दा बढी प्रशिक्षित अभिकर्ता रहेका छन् । कम्पनीले देशभर करिब १ सय ७९ भन्दा बढी शाखा तथा उपशाखामार्फत् जीवन बिमासम्बन्धी सम्पूर्ण सेवा उपलब्ध गराइरहेको छ । कम्पनीले स्वदेश र विदेशमा गरी करिब २६ लाखभन्दा बढी व्यक्तिको बीमा गरिसकेको छ । १८ वर्षदेखि जीवन बीमाको क्षेत्रमा क्रियाशील नेपाल लाइफले विभिन्न खालका बिमा योजना सञ्चालनमा ल्याएको छ । ती योजनाहरूमध्ये सबैभन्दा पछाडि कम्पनीले नेपाल लाइफ सदाबहार जीवन बिमा योजना सञ्चालनमा ल्याएको छ । कम्पनीले विभिन्न थप ऐच्छिक सुविधासहित यो योजना सञ्चालनमा ल्याएको जनाएको छ ।
यो बीमा योजना खरिद गर्नका लागि ११ वर्ष पुगेको हुनुपर्छ भने ६५ वर्ष ननाघेको हुनुपर्नेछ । ऐच्छिक सुविधा प्रवेश उमेर (दुर्घटना मृत्यु लाभ, बिमाशुल्क छुट सुविधा र अशक्त सुविधा) लिनका लागि १६ वर्ष र (घातक रोग सुविधा) लिनका लागि १८ वर्ष हुनुपर्नेछ । यस योजनामा न्यूनतम बिमाशुल्क भुक्तानी अवधि ५ वर्षको हुनेछ भने अधिकतम बिमाशुल्क भुक्तानी अवधि २० वर्षको हुनेछ । बिमाशुल्क भुक्तानी समाप्त हुने अधिकतम उमेर ७० वर्ष रहेको छ । बिमाशुल्क भुक्तानी तरिका एकल, वार्षिक, अर्ध–वार्षिक, त्रैमासिक र मासिक रहेको कम्पनीले जनाएको छ ।
यस बीमा योजनाअनुसार बीमा प्रारम्भ भएको मितिले १ वर्षपछि वार्षिक २ किस्ता बीमाशुल्क प्राप्त भएपश्चात् बिमांकको ५ प्रतिशतका दरले हुन आउने रकम प्रत्येक वर्ष बीमा अवधि समाप्तिसम्म बीमितलाई भुक्तानी गरिन्छ । बीमालेख चालू रही बीमा अवधि समाप्ति मितिसम्म बीमित जीवित रहेमा प्रत्येक वर्ष ५ प्रतिशतका दरले प्रदान गरिने रकम कट्टा गरी बाँकी हुन आउने बिमांक रकम र आर्जित बोनस बिमालेख अवधि समाप्तिमा एकमुष्ट दिइनेछ । बिमालेख चालू भएको अवस्थामा बिमाशुल्क भुक्तानी अवधिभित्र बिमितको मृत्यु भएमा बीमालेखअन्तर्गत पूरा बिमांक रकम र नियमअनुसारको बोनस रकम एकमुष्ट प्रदान गरिने छ । यसमा बीमितलाई प्रत्येक वर्ष ५ प्रतिशतका दरले आंशिक भुक्तानी गरेको रकम कट्टा गरिनेछैन । एकल बिमाशुल्क योजनामा बीमाशुल्क भुक्तानी अवधिभित्र बीमितको मृत्यु भएमा बिमांक रकम र आर्जित बोनस वा एकल बिमाशुल्क रकममध्ये बढी हुने रकम बिमितले इच्छ्याइएको व्यक्तिलाई भुक्तानी गरिन्छ । सबै किस्ता बिमाशुल्क भुक्तानी गरेको बिमालेखमा बिमा अविध समाप्तिपश्चात् जीवनभर कुनै पनि समयमा बिमितको मृत्यु भएमा पुनः बिमांक बराबरको रकम प्रदान गरिने छ । सबै किस्ता बीमाशुल्क भुक्तानी नगरेको बीमालेख परिपक्व भएमा बिमा शुल्क भुक्तानी अवधिपश्चात्को थप सुरक्षा अवधिमा कुनै घटना भएमा घटनाबापतको रकम प्रदान गरिनेछैन । साथै एकल बिमाशुल्क भुक्तानी योजनामा बीमा योजना शुरु भएको १ वर्षभित्र कुनै पनि कारणले बीमितको मृत्यु भएमा एकल बिमाशुल्कको ८० प्रतिशतले हुन आउने रकम र २ वर्षभित्र कुनै पनि कारणले बीमितको मृत्यु भएमा एकल बीमाशुल्कको ८५ प्रतिशतले हुने रकम रकम भुक्तानी गरी सो बिमा योजना रद्द गरिने कम्पनीले जनाएको छ ।

प्रकाशित समय २०:२५ बजे