पोखरा । नेपालको बीमा उद्योगमै पहिलो पटक सिटिजन लाइफ इन्स्योरेन्सले “सिटिजन लिडर डिस्कोर्स” प्यानल छलफल कार्यक्रम आयोजना गरेको छ । पोखरामा सम्पन्न उक्त कार्यक्रममा विशेष प्यानल डिस्कोर्स सत्र सञ्चालन गरिएको थियो । कार्यक्रमको सहजीकरण कम्पनीको तालिम विभाग प्रमुख कुबेर पाठकले गर्नुभएको थियो । कार्यक्रममा कम्पनीका सिटिजन लिडर्सहरू ईश्वरीप्रसाद बराल, टुकबहादुर राना, सुरेश बाबु शर्मा, राजु श्रेष्ठ तथा लक्ष्मी लामिछानेले प्यानलिस्टको रूपमा सहभागिता जनाउनुभएको थियो । छलफल ‘सक्सेस, करियर लेभलपमेन्ट, रिक्रुटमेन्ट, पोलिसी पर्सिस्टेन्सजस्ता महत्वपूर्ण विषयहरूमा केन्द्रित थियो ।

प्यानल छलफलमा टुक बहादुर रानाले पछिल्लो समय बढ्दै गएको व्यतित बीमालेखलाई सम्पूर्ण एजेन्सी व्यवसायको साझा चुनौतीका रूपमा प्रस्तुत गर्दै केवल बिक्रीमा होइन, पोलिसी पर्सिस्टेन्समा ध्यान दिनुपर्ने आवश्यकता औंल्याउनुभयो । उहाँले पोष्ट ट्रेनिङ फलोअप सिस्टम, सेल्फ लर्निङ कल्चर, क्याइन्ट सर्भिसिङ क्यालेन्डर तथा रिन्युअल रिमाइण्डर मेकानिज्मजस्ता व्यावहारिक समाधानहरू सुझाउँदै ‘बिक्रीभन्दा पनि दीर्घकालीन सम्बन्ध निर्माण नै हाम्रो लक्ष्य हुनुपर्छ’ भन्ने धारणा राख्नुभयो ।

ईश्वरीप्रसाद बरालले आफ्नो २१ वर्षको अनुभव साझा गर्दै बीमालाई केवल पेशा होइन, यसको मूल्य र सामाजिक जिम्मेवारी बुझ्न समय लाग्ने यथार्थ प्रस्तुत गर्नुभयो । ग्रामीण क्षेत्रमा सम्बन्धमा आधारित विश्वास, बढ्दो वित्तीय सचेतना तथा एजेन्टको प्रत्यक्ष पहुँचका कारण बीमा व्यवसाय अझ प्रभावकारी हुने उल्लेख गर्दै ‘जहाँ विश्वास बलियो छ, त्यहाँ बीमा सहज हुन्छ’ भन्ने सन्देश दिनुभयो ।

सुश्री लक्ष्मी लामिछानेले बीमालाई पूर्णरूपमा विश्वासमा आधारित पेशा भएको उल्लेख गर्दै महिलाहरू यस क्षेत्रमा अत्यन्त सफल हुन सक्ने बताउनुभयो । महिलामा रहेको जिम्मेवारीबोध, संवेदनशीलता र परिवारप्रतिको सोचले परिवार केन्द्रित सुरक्षा सन्देश प्रभावकारी रूपमा प्रवाह गर्न सकिने उहाँको धारणा थियो । उहाँले ‘महिलाको संवेदनशीलता र जिम्मेवारीपन नै बीमा व्यवसायको शक्ति हो’ भन्ने दृष्टिकोण प्रस्तुत गर्नुभयो ।

सुरेशबाबु शर्माले नेपालमा अझै ठूलो जनसंख्या बीमाको दायराबाहिर रहेको तथ्य प्रस्तुत गर्दै बीमाको पहुँच विस्तारमा अभिकर्ताको भूमिका अत्यन्त महत्वपूर्ण रहेको बताउनुभयो । अभिकर्ता केवल सेल्स पर्सन नभई फाइनान्सियल एजुकेटर, रिस्क एड्भाइजर तथा फ्यामिली प्रोटेक्टरको भूमिकामा रहनुपर्ने उल्लेख गर्दै ‘हरेक घरमा बीमा, हरेक परिवारमा सुरक्षा’लाई साझा मिशन बनाउनुपर्ने धारणा व्यक्त गर्नुभयो ।

त्यसैगरी राजु श्रेष्ठले बदलिँदो सामाजिक परिवेशमा आजको आवश्यकता अनुसारको अभिकर्ता कस्तो हुनुपर्छ भन्ने विषयमा आफ्नो विचार राख्नुभयो । डिजिटल, सचेत र तुलना गर्ने ग्राहकको युगमा अब केवल पोलिसी बेच्ने होइन, प्रोफेसनल फाइनान्सियल कन्सल्ट्यान्टका रूपमा अभिकर्ता रूपान्तरण हुनुपर्ने आवश्यकता उहाँले औंल्याउनुभयो ।

कार्यक्रम अत्यन्त प्रभावकारी, प्रेरणादायी तथा सहभागीमुखी बनेको थियो । कार्यक्रममा उठाइएका विषयहरूले एजेन्सी व्यवसायसँग सम्बन्धित पेशागत चुनौती, सुधारका सम्भावित क्षेत्र तथा दीर्घकालीन रणनीतिबारे गहिरो संवादको वातावरण सिर्जना गरेको थियो । कार्यक्रमको सफलतापछि कम्पनीले आगामी दिनहरूमा पनि यस्ता संवादमुखी तथा नेतृत्व विकास केन्द्रित कार्यक्रमहरूलाई निरन्तरता दिने प्रतिबद्धता व्यक्त गरेको छ । सिटिजन लाइफ इन्स्योरेन्सले सधैं नेतृत्व विकास, पारदर्शी संवाद र पेशागत सशक्तीकरणलाई प्राथमिकता दिँदै बीमा क्षेत्रमा नयाँ अभ्यासहरू स्थापना गर्दै आइरहेको छ । सिटिजन लिडर डिस्कोर्स त्यसैको एक महत्वपूर्ण र दूरदर्शी कदम सावित भएको छ ।

प्रकाशित समय ११:१० बजे