काठमाडौं । नेपालले सार्वभौम क्रेडिट रेटिङ्गमा डबल बी स्कोर प्राप्त गर्न सफल भएको छ । नेपालले प्राप्त गरेको रेटिङ्गले नेपालको अर्थतन्त्रको संरचना, सार्वजनिक वित्त परिचालन र समष्टिगत आर्थिक तथा वित्तीय अवस्था लगानी मैत्री र उन्नत रहेको संकेत गरेको छ । क्रेडिट रेटिङ्गको नतिजाले नेपालको साख क्षमता उच्च रहेको, वित्तीय तथा आर्थिक क्षमता सवल रहेको र अन्तर्राष्ट्रिय बजारबाट ऋण लिनु पर्दा न्यून व्याजदरमा ऋण प्राप्त गर्न सक्ने अवस्था सिर्जना गरेको छ । यसले निजी क्षेत्रको विश्वास अभिवृद्धि गर्न र वैदेशिक लगानी आकर्षित गर्न समेत सहयोग पुग्ने देखिन्छ ।

सार्वभौम क्रेडिट रेटिङ्गमा मूलतः अर्थतन्त्रका चार क्षेत्रहरु क) अर्थतन्त्रको संरचनगत पक्ष, ख) समष्टिगत आर्थिक उपलव्धी, ग) सार्वजनिक वित्त र घ) वाह्य क्षेत्रका आर्थिक परिसुचकको विस्तृतरुपमा लेखाजोखा गर्ने गरिन्छ । मुलुकको सार्वभौम क्रेडिट रेटिङ्ग गर्दा यस्ता पक्षहरुलाई विभिन्न सार्वभौम रेटिङ्ग मोडल र गुणात्मक मापन विधिबाट स्वतन्त्ररुपमा मूल्यांकन गरी प्राप्त स्कोरलाई न्यूनतम डी देखि अधिकतम ट्रिपल ए सम्म रेटिङ्ग प्रदान गर्ने गरिन्छ । ट्रिपल ए ले मुलुकको हाइ क्रेडिट क्वालिटी रहेको देखाउँदछ भने डी ले डिफल्टको अवस्थालाई ईंगित गर्दछ । उक्त प्रक्रिया बमोजिम फिच रेटिङ लिमिटेडले नेपालको आर्थिक संरचना, सार्वजनिक वित्तको अवस्था, आन्तरिक तथा वैदेशिक ऋणको अवस्था, मौद्रिक तथा वित्तीय क्षेत्रका सूचकहरुको अवस्था, वाह्य क्षेत्रका आर्थिक परिसूचकहरु, सोह्रौं योजनाले परिलक्षित गरेका आर्थिक वृद्धिको मध्यकालिन तथा दीर्घकालिन खाका लगायतका विवरण र तथ्यांकको विश्लेषण गरेको थियो । यसका साथै गुणात्मक मूल्यांकनको चरण अन्तर्गत फिच रेटिङ्गस लिमिटेडको विज्ञ समूहबाट सेप्टेम्बर ११-१३, २०२४ मा नेपालको स्थलगत भ्रमण भई प्रधानमन्त्री तथा मन्त्रिपरिषद्को कार्यालय, अर्थ मन्त्रालय, राष्ट्रिय योजना आयोग, नेपाल राष्ट्र बैंक लगायतका सरकारी निकायका उच्च पदाधिकारहरुसँग परामर्श र छलफल गरेको थियो भने निजी क्षेत्र र नेपालस्थित द्विपक्षीय तथा बहुपक्षीय विकास साझेदार निकायका अधिकारीहरुसँग समेत परामर्श गरेको थियो । नेपालले प्रस्तुत गरेको पुर्वाधार विकासको मध्यकालिन र दीर्घकालिन योजनाको कार्यान्वयनको मुल्यांकन गर्न नमुनाको रुपमा नागढुंगा सुरुङ्ग मार्गको अवलोकनसमेत गरेको थियो । हाल फिच रेटिङ्गस लिमिटेडको टोलीले नेपालको सार्वभौम क्रेडिट रेटिङ्ग गरी सोको प्रतिवेदन प्रेषित गरेको छ ।

सार्वभौम क्रेडिट रेटिङ्गलाई विश्वका लगानीकर्ता तथा वित्तीय सेवा प्रदान गर्ने निकायले कुनै पनि मुलुकको लगानीको वातावरण मूल्यांकनको आधारको रुपमा लिने गर्दछन् । यसले मुलुकको अर्थतन्त्रको संरचना र अवस्थालाई स्वतन्त्र विज्ञको आँखाबाट मूल्यांकन गरी यथार्थ अवस्थालाई विश्वभरका लगानीकर्ता समक्ष पुर्‍याउने गर्दछ । यस अर्थमा सार्वभौम क्रेडिट रेटिङ्गलाई मुलुकले आफ्नो अर्थतन्त्रलाई विश्वसामु खुलारुपमा मूल्यांकन गराई पारदर्शिता कायम गरेको रुपमा समेत लिन सकिन्छ । नेपालको सार्वभौम क्रेडिट रेटिङ्गले नेपालको अर्थतन्त्रलाई अन्तर्राष्ट्रिय समुदायसम्म प्रस्तुत गरेको छ । सार्वभौम क्रेडिट रेटिङ्ग विगतका तथ्यांक विश्लेषणको नतिजामात्र नभएर भविष्यपरक दृष्टिकोणसमेत हो । यसले अर्थतन्त्रको भावी दिशा र सम्भावनाको आँकलन गर्दै मुलुकले भविष्यमा आफ्नो ऋण दायित्व पूर्णरुपमा र समयमै भुक्तानी गर्नसक्ने क्षमताको मापन गर्दछ ।

क्रेडिट रेटिङ्गको नतिजालाई दक्षिण एसियाली मुलुकहरुको रेटिङ्ग नतिजासँग तुलना गर्दा नेपालले प्राप्त गरेको रेटिङ्ग सन्तोषजनक रहेको छ । यसले सरकार, निजी क्षेत्र र सम्पूर्ण लगानीकर्ताहरुको लागि उत्साह सिर्जना गरेको छ । नेपाल सन् २०२६ मा अल्पविकसित राष्ट्रबाट स्तरोन्नति भई नविनतम एवं वैकल्पिक वित्तका स्रोत परिचालन गर्नुपर्ने अवस्थाको पूर्व तयारीको रुपमा समेत सार्वभौम क्रेडिट रेटिङ्गलाई लिन सकिन्छ । नेपालको सार्वभौम क्रेडिट रेटिङ्गमा हाल प्राप्त गरेको नतिजाले नेपाल लगानीको लागि सहज वातावरण भएको स्थापित गरेकोले विदेशी लगानीकर्ताको विश्वास अभिवृद्धि हुन गई भावि दिनमा नेपालको पूर्वाधार, पर्यटन, कृषि, सेवा लगायतका क्षेत्रका ठूला आयोजनाहरुमा लगानी अभिवृद्धि हुने अपेक्षा गरिएको छ ।

नेपालको क्रेडिट रेटिङ्ग गर्ने फिच रेटिङ्गस् लिमिटेड, सल्लाहकार सम्बन्धी कार्य गरेको स्ट्याण्डर्ड चार्टर्ड बैंक र वित्तीय स्रोतको व्यवस्था र क्षमता विकासमा सहयोगी भूमिका निर्वाह गर्ने बेलायत सरकारको फरेन कमनवेल्थ एण्ड डेभलपमेन्ट अफिसलाई अर्थ मन्त्रालयले धन्यवाद व्यक्त गरेको छ । साथै, यस प्रक्रियामा योगदान पुर्‍याउने नेपाल सरकारका सम्वद्ध निकाय तथा पदाधिकारीहरु, निजी क्षेत्र, विश्व बैंक, अन्तर्राष्ट्रिय मुद्रा कोष, एशियाली विकास बैंक लगायत यस प्रक्रियामा सामेल भएका सम्पूर्णमा समेत अर्थमन्त्री विष्णुप्रसाद पौडेलले धन्यवाद दिएका छन् ।

प्रकाशित समय १२:३४ बजे